شعر بالعاميه زمن الصكوك(لمحمد حسني ابراهيم)

أللحق وخد حقك صكوك ليرقصوك وينقصوك
للبيع ضميرنا وينصفوك تاخد بكام ويقرطسوك
اللحق وخد حقك صكوك
غلبان ياشعب يفرحوك وبيسعدوك ولا يجرحوك
وان خدت حاجه يلحقوك ويقولوا يعنى مال أبوك
أللحق وخد حقك صكوك
تاخد هاتشبع م اللى فاض ويقولوا خيرهم دا اللى فاض
مشغول بقى ولا انت فاض تقعد تلم يبحترووك
أللحق وخد حقك صكوك
متقاله من يوم الأزل خيرنا ياعالم لم يزل
حتى دعاكم لو نزل يطلع كمان ولا يسمعوك
أللحق وخد حقك صكوك
اوعى تقولى مش هابيع وتسيب بقى حقك يضيع
هى كده حتة وقيع يرموها قال بيريحوك
أللحق وخد حقك صكوك
تشبع وتتقمع ياواد وتكون غنى وسط العباد
ريح ضميره بالمزاد الأونه دورك ويبعوك
أللحق وخد حقك صكوك
تبقى يامصرى قطع غيار كبده وكلاوى مش هزار
لازم وحتما للكبار هما يعيشوا ويشكروك
أللحق وخد حقك صكوك

شعر / محمد حسنى ابراهيم
عضو اتحاد كتاب مصر

عموما مرحبا بأشعاره الزجلية

زجل العب يا معلم ليلتنا عفاريت وشعوزه